وليد يعزم البنت تتغدا معانا توافق واهيا ماسكه ايده بقوه وانا قلبي يشتغل و عين على وليد وعين على ايدينه وايدها
وليد: ندى اعرفج على نوره
أنا بابتسامه مصطنعه : اهلين
نوره: أهلين ندى , مين هاذي يا وليد ؟
وليد: أخت فيصل وبمكانة اختي انا بعد (( ااااااه يا قلبي ياوليد اااه كرهت هالكلمه ذالك اليوم ))
نوره: ايييه هاذي اخت فيصل ألي كل مره يسولف عنها
وليد ينساني و يسترسل مع نوره وانا قلبي يشتعل غضب وفكري يودي و يجيب حوارت تساؤلات يطرحها قلبي لعقلي (( ألحين اعتبر اخته وانتي ليش مهتمه و ليش يهمج ياندى ؟! عادي اي اخته واهوا مثل اخوج ؟ اي اهوا مثل اخوي بس لا مابي اكون اخته ؟؟ انزين منو هاذي وليش وليد نساني لهدرجه اهيا مهمه ؟؟ ممكن تكون حبيبته ؟؟ او اخته ؟؟ لالا بس وليد قال ماله خوات وبعدين هاذي من لهجتها سعوديه ؟؟ يااااربيه راسي بينفجر ))
أنا: عن اذننكم
وليد: وين بتروحين
بتلعثم احاور نفسي مادري وين اروح ياوليد بس اذا بقعد و بشوفكم باكل نفسي بنفسي
وليد: ندى
أنا: همم .. أأ.. ابي اروح الحمام
وليد: اها اوكي
اتمشى بممرات المطعم يعجبني المدخل يلفت انتباهي الجو بره و قطرات المطر اطلع وانسى وليد ونوره
اول مره امشي بدون خوف امشي بروحي بشارع ما اعرف طرقاته بس ما كان عقلي يقودني كان قلبي يبي ينسى تساؤلاته و يلهى عن وليد ونوره
المطر كان روعه و الهوا منعش و الصور كانت اجمل ، يرن تليفوني فجأه
أنا: دلووووله
دلوول: انتي ما تيوزني تغطين ولا تسألين
أنا: انتي بالي بس لهيييت
دلوله : بشنو
أنا: بوليد
دلوله: اهوا للحين عندكم
انا: اي يادلوله اي
دلوله : ها تأسفتي على المارشملوا
أنا: مااتتصورين الصدف يادلوله ما تتصورين طلع نفسي يحب المارشملوا
دلول: شكله نصيبج يالخبله
انا: تهقين اهوا نصيبي
دلال: ويييه ليكون طحتي
أنا: وين أطيح
دلال: بدباديبوه
أنا: لاااا شكووووو اهوا اصلن مثل اخوي فيصل
دلال: وصفيلي شكله
أنا بتنهيده: اسمر طويل والكتف عريض الخشم سيف و العيون كبااار مكحله ع الخفيف والنظره حاده الحلج صغير اد الزيتونه والثقل ثقل سلطان زمانه و الاخلاااق عاليه اسباااني يادلوله اسبااااني
دلال: اوه اوه اوه شنو هاذا ؟؟ هاذا صج ولا بعيونج ؟؟
أنا: لا صج يادلوله صج
دلول: هاذا كامل والكامل الله
أنا: بس فيه عيب واحد :(
دلال: شنو ؟
أنا: يعتبرني مثل اخته
دلال: مو توج تعتبرينه اخوج
أنا: ايييييه انا اعتبره بس اهوا لا يعتبرني
دلال: ياحسرتي عليج يارفيجتي طبيتي ولا حد سم عليج
أنا: بس ألحين معاه نوره ومادري منو هاذي نوره تهقين حبيبته
دلول: منو نوره؟
أنا: مادري كنت قاعده معاه بالمطعم وفجأه دخلت وحده اسمها نوره احتريت وطلعت وخليتهم
دلال: وووه ماعندج سالفه اقعد على قلوبهم وبعدين لااااتضعين انتي مادلين شي
أنا: معاااي ماااب ادل ان شاء الله,, دلوله اخليج مااافي شحن
دلوله : طمنيني عليج وعلى وليد
اسكره من دلول وقلبي متعلق بالمطر و صورت نوره ووليد ابالي ليش اهتم هالكثر مااادري
بس ياقلبي لا تسال
اتجول بالطرقات اصور ألهي عمري واتمشى بروحي نسيت وليد و نسيت نوره ونسيت المطعم غابت الشمس وضعيت فيها الطريق تذكرت كرت كان فيصل كاتب فيه العنوان وحاطه بجنطتي خوفا من يوم اتوه فيه
اوقف تاكسي اعطيه العنوان وقلبي يرقع اول مره اركب تاكسي بروحي قريت القران كله بقلبي خوف ورعب وبعد معاناة خوف وصلت الحمدالله لشقتنا سالمه
ألمح وليد باللوبي
وليد بغضب: وين كنتي؟
أنا بستغراب: رحت اتمشى
وليد بأكثر عصبيه: مو قايلتلي انج بتروحين الحمام
أنا: ايه بس شفتك لاهي مع نوره و شفت الجو عجيب وطلعت
وليد بعصبيه أكثر واكثر: تعرفين شكثر خفت تعرفين شكثر حاتيت تعرفين شلون كنت مينون بالشارع ادور عليج ؟
أنا: وليد صوتك عالي والسيكيورتي يطالع فينا
وليد مو مهتم لكلامي : لا تكررين هالحركه مره ثانيه و اذا تبين تروحين مكان ثاني علميني
أنا: مو من حقك اتزفني جذي
وليد: امبلا من حقي انتي وصايه عندي ولا اسمح لج تروحين مكان ثاني الا بعلمي لما يرجع فيصل
أنا: عن اذنك بروح انام
وليد : انتي مبلله و اللوبي بارد هاج جاكيتي غطي فيه شعرج لا تمرضين
أنا: لا شكرن بروح داري ألحين و اتغطى
وليد ياخذ جاكيته و يغطي فيه شعري بغضب: لما اقولج اخذي اخذيه ولا تعاندين
يسبقني وليد لداره وأنا اوقف كالبلهاء باللوبي جاكيت على راسي و ابتسم لغضب وليد مادري ليش مستانسه بغضبه يمكن لأني حسيت بإهتمامه امشي يلتفت وليد علي ينطرني اتبعه
أدخل غرفتي اخذ شور اسمع محمد عبدو
الله واكبر ماجملك
ودي اقولك واسالك الله واكبر ماجملك
لو للحسن عرش وتاج ماظنتي غيرك ملك
اذهلت في الجلسه الحضور يازايد هالنور نور
قالوا اكيد انت االقمر ولاالقمر هو من هلك
شيل القمر واجلس بديل انت الجمال وانت الجميل
حضرت وضاعوا من حلاك والجو كله صار لك
ياسلبٍ كل العقول بالرمش والطرف الخجول
برضيك لو هم يزعلون ماعاش من هو زعلك
احساس قلبي الليله فرح افتح الدريشه استنشق باقي عطر المطر
اغط بالنوم اغط باحلامي اصحى على طق الباب (( اكيد وليد)) اجاوب نفسي تفتح عيوني بفرح اقوم اعدل شكلي اركض افتح الباب
وليد بنبرة زعل : صباح الخير
أنا: صباح النور تفضل
وليد: يالله لبسي بروح
أنا: وين
وليد: عندي اجتماع و بنطلع
أنا: انا عندي دوره اليوم ولازم اروح امس مارحت
وليد: خلاص اقطج بطريقي وامرج وانا طالع
أنا: لا خلااااص روح شغلك انا صرت ادل الطريج
وليد بنظره معبره : لبسي 10 دقايق وانتي خالصه
اصكر الباب أبتسم ولساني يقول ووووه عليك يااااحمش
ابدل على عجيل اكشخ وايد احط ميك واول مره احط ميك اب مااا احب الميك اب بس اليوم شعوري و احساسي و نفسي تبي تحط ميك اب
وليد: خلصتي
أنا: اي اي كاني طالعه
وليد: شنو حاطه بويهج
أنا: شنو مو حلو
أنا: شنو مو حلو
وليد: اممم قبل احلى
استحي انزل راسي واقوله وانا ماشيه : يالله تاخرنا
يقطني وليد على الدوره اربع ساعات مروا جنهم اربع سنين كل ثانيه اشوف الساعه انطر وقت رجوع وليد
بالي مو صوب الرسم عقلي موفيني وقلبي ملتهي ومتشوق مرت 4 ساعات ابطئ شديد وكأنهم دهر
وليد: ها شلون الرسم
أنا: امممم عادي ماخذيت شي يديد<<< جذابه بالج ماكان يمه
وليد: اليوم بنتغدا انا وانتي و نوره
أتفاجا ألتفت على وليد بسرعه واحاول ادارك نفسي عشان ما ينتبه بس وليد فطين و لمح تفاجئي و انزعاجي و يبتسم
أنا: نوره سعوديه؟
وليد: اي
أنا: ساكنه هني؟
وليد: يب
أنا: من زمان تعرفها؟
وليد: يس
أنا: واضح علاقتك فيها قويه؟
وليد: حيل<< أأأأأأأأأأأفهم عااااد قولي منو اهيا وخلني ارتاح
أنا: اممم الله يخليك لها ويخليها لك
وليد: امين
اعصب من طريقة رد وليد و عدم مبالاته: انا اعتذر مابي اتغدى معاكم
وليد: ليش عندج شي ؟
أنا: لا بس مابي
وليد: انزين بعد انا مابي اروح
استانس ولا قلت له لا ولا هم يحزنون جني ماصدقت قالها
ابي ايس كريم وابي اتمشى بالهايد بارك
يلبي وليد مطلبي و نتمشى بين الورد و الشجر و تاخذنا السوالف
أنا: ما حسيت بوحشه وانت ساكن بروحك بالبيت
وليد: الوحشه كانت قليله بالنسبه لشعوري ذالك الوقت , بس لهيت بالشغل و نسيت
بستغراب اسأل: كنت تشتغل ؟؟
وليد: ايه , بعد وفاة الوالد الكل استغل الوضع بعدم وجود رقيب الكل قعد يسرق و ينهب و اكتشفت ان الشركه خسرانه و مطلوبه فضيت عمري للشركه درست مسائي و اشتغل بالنهار لما وقفتها على ريولها مره ثانيه والفضل يرجع لربع ابوي الأوفياء علموني اصول الشغل
فجأه احس بداور وتعب أقطع كلام وليد: وليد خلنا نرجع البيت تعبت
وليد: فيج شي
أنا: لا بس حاسه بدوار
وليد يمسك جبهتي : انتي حاره وايد اكيد هاذا من لعبج تحت المطر امس
نرد شقتنا بعجل من وليد : بروح انادي خالد
أنا: منو خالد ؟
وليد: دكتور عمارتنا يدرس طب هني واهوا دكتورنا بالحالات المستعجله
أنا: ما يحتاااج ألحين اتسبح و تروح الحراره
فجأه احس بدوار استند على الطوفه وليد يرفعني شوي : شفتي بدا الاغماء
استند على وليد يوديني غرفتي يستأذن ويروح ينادي خالد
ثواني مرت خالد و وليد داخلين علي
خالد يطمن وليد انها حالة برد و جسمي ضعيف ما يتحمل شوية راحه مع فيتامينات و ينتهي المرض
يسلم خالد ويطلع
أنا: وليد ألحين هاذا خالد
وليد: ايه اشفيه
أنا: شنو سوداني
وليد: وهاذا انتم يالحريم حتى وانتم تعابه تخزخزون بالريايل محد يفلت من لسانكم
أنا: لا لا جد وليد شنو اصله
وليد: اي سوداني
أنا: انا قلت ألحين خالد طول و عرض وزين قلت اببببببببد بشوفه و على طول بشفه
وليد: شوفيني انا ,, أنا أكفي
أنا: انت وايد مغتر بعمرك ,, خالد السوداني أملح منك
أنا: ما يحتاااج ألحين اتسبح و تروح الحراره
فجأه احس بدوار استند على الطوفه وليد يرفعني شوي : شفتي بدا الاغماء
استند على وليد يوديني غرفتي يستأذن ويروح ينادي خالد
ثواني مرت خالد و وليد داخلين علي
خالد يطمن وليد انها حالة برد و جسمي ضعيف ما يتحمل شوية راحه مع فيتامينات و ينتهي المرض
يسلم خالد ويطلع
أنا: وليد ألحين هاذا خالد
وليد: ايه اشفيه
أنا: شنو سوداني
وليد: وهاذا انتم يالحريم حتى وانتم تعابه تخزخزون بالريايل محد يفلت من لسانكم
أنا: لا لا جد وليد شنو اصله
وليد: اي سوداني
أنا: انا قلت ألحين خالد طول و عرض وزين قلت اببببببببد بشوفه و على طول بشفه
وليد: شوفيني انا ,, أنا أكفي
أنا: انت وايد مغتر بعمرك ,, خالد السوداني أملح منك
وليد: اها يعني طلع السوداني عاجبج خلاااص ألحين اناديه يشربج الدوا بيده
أنا: لاااااا مابي
أنا: لاااااا مابي
وليد: لييييييييش عشان تقومين من بعده زي الفرسه
أنا: وانت ما تصدق
وليد : اخليج ترتاحين اي شي تبين انا بالصاله
أنا: وليد شكرن
وليد: ولو ما سوينا شي
يطلع وليد و كل شوي يطل علي احس فيه يغير الكمادات حراراتي تزيد و وليد يحاتي اكثر
وليد: ندى قومي شربي شوربه مفيده لج
أنا: لا مابي ما اقدر بطني يعورني
وليد: شربيها ان شاء الله فيها الشفاء
احاول اشربها اول ملعقه مشت ثاني ملعقه هم بلعتهاا ثالث وحده ماحسيت واستفرغت كل الي بطني على وليد
أنا: اسفه اسفه جدن وليد
وليد: عادي ما حصل الا كل خير ياندى لا تتاسفين
أنحرج اطلب منه يخليني انام يمسح على راسي يطمني انه ما حصل شي انحرج منه
يمرون يومين وانا بالفراش ووليد يداريني
صباح اليوم الثالث احس بالعافيه قدرت اقوم من فراشي افتح باب داري اشوف وليد نايم بتعب ماااقصر تعب معاي وايد
ألبس اسوي له ريوق بدون لا يحس
أنا: وليد يالله قوم بنصير الظهر
وليد: هااا.. شلون قمتي من فراشج لا تتعبين
أنا: وليد مافيني الا العافيه الحمدالله انا اليوم بخير
وليد: والله اليوم احسن لا ما اصدق بروح انادي خالد
انا: كاااني شوف شحلاتي رديت زهره متفتحه ما احتاج خالد
وليد: اي والله كانت الطبيعه محتاجتج اليومين الي راحوا
ابتسم بخجل اغير الموضوع نتريق ويعزمني وليد على طلعه
وليد: بروح سينما
أنا: امممم اي والله احتاج اشوف فيلم
المرض قرب وليد لي اكثر وحبيته اكثر اهتمامه فيني غريب و حنانه كبير
ندخل السينما : اطلب بوب كورن و بيبسي و مارشملوا
يبتسم وليد و يشتري لي ألي طلبته ندخل السينما نقعد ورا القاعه ظلمه و الفيلم جدن رائع بس رومنسي بزيااااده
البدايه كانت حلوه بس الاخوان كل مالهم يتعمقون وانا تعودت كل مشهد مخل لا ارداي اغمض عيوني على قولة الوالد رقابه ذاتيه وليست سلطه رقابيه الفيلم كل مشهد اعمق واقرب من الثاني اتصدد عنه انزل راسي ألتفت مااا اقدر اشوووف هاللقطات لاحظت وليد يطالعني ويضحك
وكل ماطلع مشهد يطالعني و يضحك اشرت له بحواجبي بس عااااد
وانا اتصدد جرحت صبعي من سلاسل جنطتي حس وليد بفزتي وشاف اني ماسكه اصبعي
تله صوبه وقلبي خفق يتفحصه و يمسحه بيده طالعني ومسك صبعي وابتسم التفت للفيلم ولا عاد طالعني ولا قدرت انا اطالع الفيلم
يوصل اتصال من فيصل يبشرني انه رجع ويسأل وينا اطمنه و اقوله راجعين
نرجع البيت نرحب بفيصل و نتحمد له بالسلامه
وليد: رجعت مبجر
فيصل: المؤتمر خلص مبحر
ندى: شلون المؤتمر
فيصل: زيين ممتاز كان ناجح بس كنت احاتيج لو ماخذج معاي احسن
ندى: ان شاء الله مره ثانيه
فيصل : وليد ترا ضاري وحمود وسالم بيتعشون عندنا الليله
وليد: عندكم اجتماع هني
فيصل: تقدر تقول مناقشة عمل
ندى: فيصل و انا وين اروح
فيصل: تقدرين تقعدين معانا
وليد تتغير ملامحه يقاطع فيصل باقتراح: ليش تقعد ليش ماتروح لزوجة خالد تحت
أنا: مااابي ما اعرفها
وليد يطالعني يحط عينه بعيني وده يقول لا تقعدين بس ما يقدر : احسن من قعدت شباب
حسيت بغيرت وليد يطير قلبي فرح اتذكر نوره وحرتي احاول اردها لوليد
فيصل: خالد ومرته ماراح يكونون موجودين
ندى: عادي اقعد عندكم
وليد تخنقه الكلمه يستاذن ويطلع
18 comments:
احلى الحبايب اللي دايم يغارون:p
واهي كل مكان رازة ويهها
شباب شيحشرها بينهم :@
still last part:D
don't b late
شنو ذي يالمجرمة عيشتيني الجو كأني قاعد اطالع حلقة من مسلسل خليجي ماشاء الله عليج !
حمستيني خلاص بكتب قصة :D
يلا كملي كملي
الحلقة الجاية هي الاخيرة؟؟؟
قولي متى بالضبط عشان اجيب المخدة والشاي وانبطاااااااااااح
وكويس ما كان في فاصل اعلاني هنا . ولا تسويها المرة الجاية ..
القصة جد رائعة .. لكن بتخلص الحلقة الجاية
ههههههههههههههههه
أنا: لاااا شكووووو اهوا اصلن مثل اخوي فيصل
( لالالالالالاههه .. عن العيارة عاد .. اخ منكم يالحريم ... اوولله ياكبرهه عند ربي !! :)
أنا بتنهيده: اسمر طويل والكتف عريض الخشم سيف و العيون كبااار مكحله ع الخفيف الحلج صغير اد الزيتونه والثقل ثقل سلطان زمانه و الاخلاااق عاليه اسباااني يادلوله اسبااااني
( هذا جنه انا !! .. اي طل !!!
بس اسباني واسمر جنهه مو راكبهه !!
على هالغيرة شكلها صارت :)
مترقبين على احر من الجمر :)
وتحياتي ...
ويسلموااااااااااااااااا :)
متابعة و ناطرة النهاية
الظاهر بتكون كلولولوش :)
خوش قصه والله
اتمنى انج اتابعينها ولا تقطعين فجأه مثل ذيج المره :p
لووول انا حدي مندمج بالقصه بس ضيق خلقي شي واحد و ما خلاني اكملها
مو انا من زمان مو شابك = من زمان مو داش بلوقج = يعني و انا قاعد اقؤا آخر بوست لج و اشوف الأسامي وليد و مادري منو و انا اقول منو هذولا و ليش شسوا من قبل ؟!
لوول لما اييني وقت اكون فيه قاضي بقراها من البدايه انشاءالله
ولا قصورا بالقصة ..
بس تصدقين اختي الموسيقى خذتني عالم ثاني .. حيل بعيد ..
اتمنى إذا في امكانية أعرف من وين ألاقيها ..
تحياتي ..
كبرياء ورده:
بداية حب غيره ;)
be here
علي الملا :
ياهلا ومرحبا فيك
اشجعك تكتب احس قلمك مبدع واااااااااايد
يالله قو هد ;)
مشتااااق :
مادري ليش احس تقرا القصه غصب ;)
الفواصل لا بد منها mbc مو احسن مني ;P
كويت الخير
اسباني مسوي تان :P:P
انا مضيعه وليد هاليومين اذا هو انت علمني عشان اطمن فيصل :P:P
تروث :
صايره فانجا تتنبئين
يالله عااازمينج على العرس كشخي وتعالي :P:P
جروووووووووحي :
عيني بعينك عيني بعينك قريت هالبوست ولا لع اعترف :P:P
أحمد اعلامينا<< جذي تنكتب اعلامينا ؟!
والله ماعندي سايت معين لها بس كنت اسوي سيرتش بعمي قوقل عن موسيقى كلاسيكيه و طلعت لي هاذي لقيتها بواحد من المنتديات
اذا تبيها اخذها عليك بالعافيه بس سو كلك على Get tracks تحت بوكس الموسيقى و بيطلع لك اللنك
مشكلة لما الغريب يغار عليها أكثر من أخوها
الحين السعودية طلعت منو؟
بلوقر:
اخوها غيور بس يشوف اخته صغيره للحين :P
اقرا غصب .. اجل الفراسة عندك يبغالها شوية تمرين
وبعدين صح اقراها غصب .. لأنها رائعة وما عندي وقت اقراها وانا في الدوام وما احب القراءة المتقظعة انا
لكن هنا انكسرت القاعدة .. اتلهف للقراءة والله.
بعدين حكاية الفواصل هذي كويس انها بلون وحجة غير "عشان اطمرها" ههههههههههه
مشتاااق :
لوووووول لو قاريه ردت من قبل لا احط البوست الثاني جان مخليه الفواصل نفس اللون عشان بس تقراها
:P:P
Post a Comment