Wednesday, March 11, 2009

كذب المنجمون ولو صدقوا

فتحت المسن من الملل مالقيت أحد أون لاين شفت الايميل لقيت 99 رساله لم تقرأ بعد
شي عااادي عندي يصك البريد الالكتروني 400 رساله ما انفتحت ومتى ما اشتهيت وصار لي مووود قريتهم
ومن الفراقه و الفضاوه قريت ايميل ورا ايميل لما وصلت لهل ايميل و قفني لحظات وأنا أتأمل بهالعيوز العمياء ما أخفيكم أنه بدا الرعب يسكني مو تصديقا لكن مجاراتن للاحداث ألي صارت أخليكم مع العيوز العميا و تنبؤاتها






هذه المرأة العمياء..'فانجيليا جوشتيروفا ديميتروفا'
واسمها المختصر فانجا .
ولدت في 31 يناير 1911م في Strumica ، احدى مقاطعات الإمبراطورية العثمانية .
وتوفيت هذه العجوز بعد 85 عاماً وتحديدا بتاريخ 11 اغسطس عام 1996م في Petrich ,Bulgaria بيتريش ، بلغاريا ..
مايثير الغرابة ان هذه العجوز كانت قد تنبأت بعدة امور ووقعت منها على سبيل المثال..
1- تفكك الاتحاد السوفيتي ، وقد حصل في نفس العام الذي تنبأت فيه بتفكك الاتحاد !!
2- انفجار مفاعل تشرنوبل النووي ، وقد حصل في نفس العام الذي ذكرت !!
3- تنبأت بتفجيرات 11 سبتمبر وقالت مانصه ((إن شقيقين أميركيين سوف يتعرضان لهجوم من جانب طيور من الفولاذ))!!
4- اما الامر الذي دعا الناس الى نسيانها الفترة الاخيرة فهو قولها بأن البيت الابيض سيكون فيه رئيس اسود!! وذلك اثناء حكم بوش الاب ولكن جاء بعد بوش كلينتون ثم بوش الابن ، وخلال هذه الفترة فقدت فانجا مصداقيتها ، ولكن في الاخير وبعد موتها بــ 12 عاماً جاء اوباما الاسود الى البيت الابيض !!
5- تنبأت باحداث اوستينا الاخيرة وكانت هذه الاحداث من اعادت فانجا الى الاذهان !! ثم تذكر الناس مقولتها بشأن الرئيس الاسود الذي يتولى حكم البيت الابيض 6- اكثر الامور غرابة انها تنبأت ان الحرب العالمية الثالثة سوف تندلع في فبراير عام 2010م بعد عامٍ مالي عصيب !! (أي بعد سنه تقريباً من الان )!! بل انها حددت سبب الحرب وقالت انها بسبب محاولة اغتيال اربعة رؤوساء دول !!
7- قالت اثناء مرضها الذي ماتت فيه ان هنالك فتاة فرنسية عمرها عشر سنوات انذاك عام 1996م سوف تكون وريثة فانجا في التنبوءات وسوف تظهر اثناء الحرب العالمية الثالثة !!
هذا الرابط يتحدث عن هذه العجوز الغريبة .. Wikipedia
http://en.wikipedia.org/wiki/Baba_Vanga



سؤال ودي أعرفه هالعيوز مسلمه ولا لع ؟؟؟
أشوفها لابسه حجاب ومالي خلق اقرا ويكيبديا ألي يقراه ويعرف الدين يعلمني شنو ديانتها ؟؟؟


====






اليوم أنا صايره سنعه بزياااده
قعدت من النوم واشتهيت أسوي طبق قمت رحت ادور على كتب الطبخ وادور لي طبق اسويه
الطبق ما صار طبق صاروا 5 اطباااق ؟؟؟
سويت 3 حلو و2 موالح وكنت بسوي الكتاب كله بس الوقت ما اسعفني صراحه
أمي تدخل و تتحلطم تقول اني حست المطبخ وأنا أرد يا ميمتي عمري 23 مو 13 عشان أحوس المطبخ
ترد علي : الناس لا دخلت المطبخ ودها تسوي شي تسوي طبق أثنين مو عشر
أنا: المفروض تستانسين انه بنتج سنعه ولها فايده بالمجتمع
أهيا: مالت بس مالت
أنا: وجهي أنغسل ونوووو كمنت
بس شصاير بالدنيا اسوي 5 اطباق مادري !!
طبعا طبعا طبعا كل الاطباق ألي سويتهم الله يديييييييييم النعمه كلهم فاااشلين ماعدا وحده طلعت بنجاااح
الموالح واحد طالع ماااااااااااااااااااااااااااااااالح مااااينذاااق وألي يبي يرفع عداد الضغط عنده ياكل منه بالعافيه والثااانيه طلع ددددددهههههههههن الله يديمها من نعمه
والحلو : واااحد الطعم فيه ضااايع ياهو طعم كاكاو ياهو طعم زبده ياهو طعم حديد مادري شطالع
و الثاني مليااااان كريمه و يسحن الجبد و الثالث الحمدالله انه زين ينوكل
وأمي تتطنز وتقول حاستنا حوسه
الله يسامحج يا ماماتي
بس تعالوا هالحاله ألي مرت علي اليوم عاادي تمر بأي بنت ولا يسمونها شفاحة أكل ؟؟؟؟



====






خلصت من الطبخ و حوسة المطبخ

وأمي تبيني اروح بيت بنت خالتي المتوفيه الله يرحمها

وأنا ماااابي اروح ينقلب مزاجي هنااك اكتئب اتذكرها أرد مودي خيااااس قلت لها مابي بقعد

و الكل راح ومابقى بالبيت ألا انا
رحت أشوف لي مسلسل كوري
أحبببببب المسلسلات الكوريه يونسوووني احس قصصهم تمشي معاي و تشبعني
حطيت جدامي أطباق الحلو كلهم و الاب توب بينهم والكورن بحظني وقلت بسم الله
وأفتح الحلقات ومع كل حلقه يبلعون ماوراهم غير البلع
ولييييييييييييييه يشهوني للاكل بعد مع كل ألي عندي وأنا نااااويه على رجيييييييم
أقوم أوخر كل الخرابيط ألي جدامي وأروح لخدامتنا أقولها أبي أكل ياباني كوري فلبيني تايلندي المهم يكون الاكل منكم وفيكم
مادري ليش من طريقة أكلهم تعطيني أنه أكلهم لذيييييييييييييذ و يشهي
الخدامه تتحلطم مو راضيه تسوي تقول الساعه 11 و اهيا استعدت للنوم تسبحت و تنظفت وانا بكدشها مره ثانيه
وزفه مني وتحلطم منها راحت سوت لي
عيش أبيض و حوسه فلبينيه مادري شنو
جابتهم وبدت تطلع من داري قلت لهاا تعاااالي مابي سبوووون
روحي جيبيلي العصايتين ألي تاكلون فيهم مابي اكل بقفشه
طلعت وأهيا تتحلطم بالفلبيني أنا يقهررني لما أدخل المطبخ و اهما يسولفون بالفلبيني ودي أعرف شيقولون
يبيلي ادخل دوره فلبينوا لاانقوتش
المهم يابت العصايتين قعدت احوس بالعيش
اكل حبه حبه مااادري منو معاقبني بس شقوووول شهوت نفس
وأقعد احولف والله ما اكل بقفشه اكمل لما اخلص الطبق
بس ماااكو شبعت وانا ماكليت ربعه كله من هالخزرايتين اكل العيش و جني انقيييه
حبه حبه
ودي بس اعرف شلون يمسكونهم كل مااروح ماااكي انادي الونتر اقوله علمني ولا اكو فااايده جني يااااهل يلعب بأقلام رصاااص
وأحلا مافي الموضوع عرفت ليش هالخناافس ضعااااااااااف
بلاااه من هالعصايتين ما يمديهم يخلصون ربع الطبق ألا شبعوا
مو أحنا ناكل بالملاعق والملاعق كل سنه تكبر
خلااااااااااااااص انا قررت ارافج العصايتين

22 comments:

Manal said...

كذب المنجمون ولو صدقة
الحمد لله اني ما اسمع التنبؤات

اما شكل الكيكة يكسر اي ريجيم
:)

عفره said...

يا هلا بمنولتنا
من طول الغيبااات جاب الغنايم :P
انا يامنوله ما احب اقراهم بس هالايميل لفت انتباهي وقريته

تبيييييين حته ماتغلى عليييج :P;p

TruTh said...

لووووووووووول عفرة ترى انتي تحفة

سوالفج تهبل والله D:

اهم شي العصي اللي طاق في راسج تاكلين فيهم و تحلطم خدامتكم كااااك

بس ترى خرعتينا من ايميل العيوز،ياحسرتنا والله اذا صدقت تنبؤاتها و صار حرب عالمية السنة الياية! :(

الله يعيننا و ان شاء الله توقعاتها تخيب قولي آمين

ويعطيج الف عافية يا عسل
^_^

Paris said...

اهلين يا عفره
هاي اول مره ازور فيها مدونتج بس صراحه سوالفج حلوووة يا حلوة
و عليج بالعافيه زين انج تعرفين تسوي شي انا فرن ماعرف اشغله لووول :$
و من ناحيه المنجمين انا صراحه ماحب هالسوالف لانهم ما يصدقون اصلا و فيه احاديث للرسول عليه السلام تحذرنا منهم
فالافضل انه ما نصدقهم

تحياتي لج :)

كبرياء وردة said...

هههههههههههههههههههه

يا زين سوالفج

عادي تصير سوالف الطبخ ساعات

بس انا صج اعفس المطبخ تدش امي تقول الاعصار بس صار بالمطبخ؟

هههههههههههههه

احلى شي لما طق براسج تاكلين بالعصاية

شهيتيني عالحلو

Bloggerista said...

العيوز تنبؤاتها تخرع

الله يستر

ساره النومس said...

امبي @@


عفرة ماحددت هالعيوز اي الدول الي راح تتحارب ؟؟؟ مو ناقصين يالهوي يالهوي . ..

رحنا فيها لووووول

استغفر الله ... شكلها مو مسلم مادري في ساعات عيوزات يحطونه علشان يخافون على شعرهم :)

عفره said...

تروووث :
ياهلا ومرحباااا بالقولد فزيتور ;)
تروث انا من قرييييت هالعيوز غصيييييييت بالاكل قلت ياااحسرتي بتقوم القيامه وماااسويت شي لااخرتي
الله يرحمنا بس وتطلع هالعيوز مخرفه
انصحج انصحج بتضعفين اكلي بالعصايتين ملوتهم بتنزلييين 3 كيلو بالاسبوع ماافي شي بيدخل بطنج
:P:P

عفره said...

باااريس
ياهلا ومرحبا فيج وان شاااء الله ماتكون اخر زياره لج ;)
افااا عليييج انا سنعه بس محد مقدر :P:P

عفره said...

كبرياااء ورده :
اشووووه فيه احد مثلي

عفره said...

بلوقر:
حييييييييل

عفره said...

طموحه :
امبلا قالتلي بس مابي اعلمج :P:P

الله يحفظنا بحفظه

jro7y said...

اي العيوز هذي وصلني الأيميل بتاعها


و قريته


بس في اشهر منا مادري إذا سامعه فيه ولا لأ اسمه نوستريداموس

اهوه مات سنة 600 و شي ميلادي و كانت تنبؤاته شي مو طبيعي , انصحج تقرين عنه لأن انا بالنسبه لي شدني هالريال ولما سوو معرض الكتاب رحت و دورت كتب حقه

Mok said...

ما اعتقد هي متنبا بهذه التنبؤات هناك من يريد يسترزق منها لاحفا عبر الفنجان ورثث

عفره said...

جروحي :
قريت عن نوستراداموس
شي يخرع صراحه

عفره said...

موك:
كل شي جاايز
اشكر مرورك

I7na 3shagnaha said...

أول مرة أدري ان في مسلسلات كورية!!

أي channel

خوش بوست :)

عفره said...

بالسايت اشوفهم :D

@alhaidar said...

ماكو الا ننطر 11 شهر .. ونشوف تاليتها ;)

والحلو يوعنا ترى :)

عفره said...

ربي يحفظنا و تطلع خزعبلاتها غلط
ولا يهمك كاتبنا ما يغلى عليك الحلو تفضل مد ايدك لا يردك ألا لسانك :P:P

dalal said...

يمه تخرعين

نفس الموضوع كنت بكتب ونفس العنوان هم كنت بحط @@

عليج بالعافية على الموضوع ... وفانجا هذي صارت مشهورة بعايلتنا :)

وصاجة كذب المنجمون ولو كذبوا

عفره said...

قرررررررررريت افكارج
فانجا قالت لي :P:P:P